Historia AMAK

Historia di Asosiashon di Músiko i Artista Kòrsou

Despues di vários reunionnan na Zeemans Huis ( Hotèl Stellaris) i na e negoshi di Patricks Musicians Suplies, porfin na aña 1968, a yega na formalisashon di un Asosiashon di Músiko di Kòrsou. Motibunan pa lanta e Asosiashon di Músiko, ta e trato no korekto ku nos músikonan, tabata haña na Hotèl Inter Continental, e promé hotèl grandi di e tempu ei.

Na aña 1960, Sr. Erquimides Fermin di konhunto Cristal, tabata toka den hotèl Intercontinental i tabata kompaña vários artista estranhero. Despues di vários reklamo di parti di e gerensia di hotèl relashoná ku
e nivel musikal di nos músikonan lokal, poko poko a kuminsá inkorporá músikonan estranhero den e agrupashon musikal. E tempu ei , tabatin un Asosiashon di Músiko (AMA) ku tabata konsistí di e.o. Sr. Erquimides Fermin.

Diferente músikonan di e.o. Estrellas del Caribe, San Jose i Jovenes del Caribe, no tabata satisfecho, ku e sistema ku kosnan tabata bai den farándula. Tabata sinti e nesesidat pa bin ku un Asosiashon nobo, ku ta mas representativo pa Farándula di Kòrsou. Asina pues a tuma pasonan konkreto pa yega na un Asosiashon nobo.

E Statutonan pa e Asosiashon di Músiko nobo, inisiativa di New Burn Patricks i Peng de Windt, a keda aprobá pa gobernador dia 23 di ougùstùs 1968. Segun e dokumento e promé direktiva tabata konsistí di e siguiente pèrsona:

Edgar Palm : Presidente;
New Burn Patricks : Vise presidente;
Franklin(Peng) de Windt : Sekretario;

W.G. Trappenberg : Tesorero;
Anselmus Boy Dap : Vokal;
Alfred van der Dijs : Vokal;

Ta bon pa remarka, ku Sr.Palm(dfm) nunka no a presidí ningun reunion di direktiva i miembro.
Sr.Patricks a fungi komo presidente, miéntras sr. Peng de Windt tabata dirigí e reunionnan na nòmber di sr. Patricks, pa motibu di e komunikashon na Papiamentu.