Un grupo di musiko a hinka nan skouder bou di e proyekto aki.

No ta un sekreto ku pa hopi tempu musikonan a boga pa un forma mas digital i inovativo di komunika ku miembresia di AMAK. Netamente den e kuadro aki, un grupo di 4 musiko a bini dilanti pa ofrese nan servisio pa krea un website nobo pa AMAK.

E grupo aki ta konsisti di software developer Anouck Noorden (perkushonista kultural), digital marketer Jourich Christina (bahista miho konosi komo ‘Brilo Bass’), photographer i videographer Casimir Roosje (kantante) i finalmente e lider di proyekto Hunneley Felicia (kantante) ku ta alabes un di e miembronan di direktiva mas nobo di AMAK.

Den un periodo di apenas 3 siman, e musikonan aki a logra krea un website bunita pa AMAK. E website ta kontene notisianan rondo di farandula, informashon tokante e asosiashon AMAK i su historia, informashon di eventonan manera Festival di Tumba di Korsou i tambe awor musikonan por aplika fasilmente di un forma digital pa bira miembro di AMAK via di e website.

Den futuro e team aki lo sigui traha riba otro posibilidatnan riba e website manera por ehempel un sistema di profile pa kada miembro por log in i tuma nota di nan datos personal i tambe un sistema di webshop kaminda por kumpra produktonan of karchinan pa eventonan via di e website.

Miembresia di AMAK sigur ta hopi kontentu ku e team aki i ta yama un danki pa nan aporte na e asosiashon.